नेपाल रेडक्रस सोसाइटी कास्कीद्वारा विभिन्न गाउँपालिकामा खानेपानी परियोजनाको अनुगमन
नेपाल रेडक्रस सोसाइटी जिल्ला शाखा कास्कीको अगुवाइमा तथा द युनिका फाउन्डेसनको आर्थिक सहयोगमा सञ्चालित खानेपानी परियोजनाहरूको अनुगमन गरिएको छ। अनुगमनका क्रममा स्थानीय समुदायको सक्रिय सहभागिता रहनुका साथै परियोजनाको प्रभावकारिता र आवश्यकताप्रति चासो व्यक्त गरिएको थियो।
लेखफाँटमा ८५ घरधुरीलाई खानेपानी सुविधा
पर्वत जिल्लाको जलजला गाउँपालिका–५, लेखफाँटमा सञ्चालित खानेपानी परियोजनाले करिब ८५ घरधुरीलाई लाभान्वित गरेको छ। लिफ्टिङ्ग खानेपानी प्रणाली अन्तरगत सोलार फिटिङ्ग जडान, ट्यांकी निर्माण तथा पाइपलाइन विस्तार कार्य सम्पन्न भइसकेको छ। अनुगमन टोलीले सम्पन्न कार्यहरूको निरीक्षण गरेको छ।
मोदी गाउँपालिका–६, ठानामा ट्यांकी निर्माण तथा पाइपलाइन विस्तार
मोदी गाउँपालिका–६, ठानामा निर्माणाधीन खानेपानी परियोजनाको अनुगमन गरिएको छ। ट्यांकी निर्माण तथा पाइपलाइन विस्तार कार्य अन्तर्गत रहेको यो योजनाबाट ८२ घरधुरी प्रत्यक्ष लाभान्वित हुनेछन्। अनुगमन टोलीको उपस्थितिमा कामको प्रगति मूल्यांकन गरिएको थियो।
मराम्चेमा करिब ५० घरधुरीलाई धारा वितरण
अन्नपूर्ण गाउँपालिका–३, मराम्चेमा सञ्चालित खानेपानी परियोजनाले करिब ४१ घरधुरीलाई स्वच्छ खानेपानी सुविधा प्रदान गर्नेछ। अनुगमन टोलीले स्थानीय उपभोक्ता समिति तथा जनप्रतिनिधिहरूसँग परियोजनाको प्रभावकारिता सम्बन्धी छलफल गरेको थियो।
अनुगमन टोलीको नेतृत्व सभापति शर्माद्वारा
नेपाल रेडक्रस सोसाइटी कास्की शाखाका सभापति डण्डराज शर्माको नेतृत्वमा सम्पन्न अनुगमनमा उपसभापति उर्मिला खड्का, कार्यसमिति सदस्यहरू सुवास अधिकारी, पार्वती कार्की, खगेन्द्रराज पराजुली लगायत पदाधिकारीहरूको सहभागिता रहेको थियो।
अनुगमनपछि स्थानीय उपभोक्ता समिति, जनप्रतिनिधि तथा लाभान्वित समुदायका सदस्यहरूले सकारात्मक प्रतिक्रिया व्यक्त गरेका छन्। आयोजना सम्पन्न भएपछि स्थानीय बासिन्दाले सहज रूपमा स्वच्छ र सुरक्षित खानेपानी प्राप्त गर्न सक्ने अपेक्षा गरिएको छ।