पोखरा, २५ चैत 

नेपाल रेडक्रस सोसाइटीले कास्कीमा पालिका स्तरको संरचना निर्माण गरेको छ । 

रेडक्रसको विधान २०२० (संशोधित २०८२) अनुसार सबै पालिका शाखामा तदर्थ समिति गठन भएको हो । रेडक्रस कास्कीले बुधबार आयोजना गरेको कार्यक्रममा पालिका तदर्थ समितिका पदाधिकारी तथा सदस्यहरुको पदस्थापना गरिएको छ । 

कार्यक्रममा रेडक्रस कास्कीका मन्त्री सन्तोष अधिकारीले तदर्थ समितिको नामावली घोषणा गरे । रेडक्रस कास्कीका सभापति उर्मिला खड्का भण्डारीले पदाधिकारी तथा सदस्यलाई सपथ गराइन् । रेडक्रस कास्कीका अनुसार पोखरा १७ उपशाखाका निवर्तमान सभापति हरिकुमार श्रेष्ठको संयोजकत्वमा रेडक्रस पोखरा महानगरपालिका स्तरीय तदर्थ समिति गठन गरिएको छ । समितिको सचिव इन्दिरा पन्त र कोषाध्यक्ष नेत्रपाणि भण्डारी छन् । ७ सदस्यीय समितिको सदस्यमा विन्दु पराजुली, पुरुषोत्तम लामिछाने, कृष्णप्रसाद दाहाल, विन्दुराज तिवारी रहेको रेडक्रस कास्कीका सभापति खड्काले जानकारी दिइन् ।

त्यस्तै रुपा गाउँपालिका स्तरीय तदर्थ समितिको संयोजक काशीराम घिमिरे, सचिव सन्दिप सुवेदी, कोषाध्यक्ष कल्पना सुवेदी छन् । समितिको सदस्यमा हर्कबहादुर खत्री, तीर्थराज न्यौपाने, रामचन्द्र सापकोटा, मेघादेवी बस्यौला रहेका छन् । यसैबिच माछापुच्छ«े ४का विष्णुप्रसाद पौडेलको संयोजकत्वमा ७ सदस्यीय माछापुच्छ«े गाउँपालिका स्तरीय तदर्थ समिति गठन गरिएको छ । समितिको सचिव कृष्णप्रसाद चापागाई र कोषाध्यक्ष प्रेमकुमारी अधिकारी र सदस्यमा टेकराज आचार्य, विश्वमोहन पोखरेल, कमला दवाडी र लक्ष्मी गौतम चयन भएका छन् । 

रेडक्रस अन्नपूर्ण गाउँपालिका स्तरीय तदर्थ समितिको संयोजक नारायणप्रसाद भण्डारी, सचिव मीनाकुमारी गुरुङ र कोषाध्यक्ष नुमलाल देवकोटा छन् । सदस्यमा झनकबहादुर खत्री, पदमप्रसाद पौडेल, खिमा खत्री र हरिबहादुर केसी चुनिएको रेडक्रस कास्कीका सभापति खड्काले बताइन् । मादी गाउँपालिका स्तरीय तदर्थ समितिको संयोजक सोमनाथ अधिकारी, सचिव नारायणप्रसाद बराल र कोषाध्यक्ष शान्तिदेवी अधिकारी छन् । समितिको सदस्यमा शुक्रराज सापकोटा, गुमानध्वज गुरुङ, चन्द्रकान्त अधिकारी र हिरा विक रहेका छन् । 

रेडक्रस कास्कीका सभापति खड्काले नयाँ विधानले राज्यको सघीय संरचनाअनुसार नेपाल रेडक्रसको संरचनालाई परिमार्जन गरी स्थानीय तहमा कार्यमुखी बनाउन जोड दिएको जानकारी दिइन् । रेडक्रसका विधान र मापदण्ड अनुसार पालिका तहमा संरचना बनाएको उल्लेख गर्दै उनले आगामी १ महिनाभित्र निर्वाचन गर्न तदर्थ समितिलाई सुझाव दिइन् । 

रेडक्रस कास्कीमा मन्त्री अधिकारीले पालिका शाखाको गठन प्रक्रिया, काम कर्तव्य र अधिकार र आचार संहिता बारे प्रष्ट पारे । उनले तदर्थ समिति गठन सम्बन्धी मार्गदर्शनको अधिनमा रहेर गण्डकी प्रदेशको समन्वयमा काम गरेको जानकारी दिए । कार्यक्रममा रेडक्रस कास्कीका निवर्तमान सभापति डण्डराज शर्मा पौडेल, उपसभापति रमा कोइराला न्यौपाने, कार्यसमितिका सदस्य खगेन्द्रराज पराजुलीले बोलेका थिए ।