पर्वत जिल्लाको तिलाहारमा दीर्घकालीन खानेपानी समस्या समाधान गर्ने उद्देश्यसहित युनिका फाउन्डेसन दि नेदरल्यान्ड र मोदी गाउँपालिका पर्वतको सहयोगमा नेपाल रेडक्रस सोसाइटी कास्कीको पहलमा सञ्चालन गरिएको खानेपानी आयोजना सम्पन्न भएको छ। ‘एक घर, एक धारा’ अभियानअन्तर्गत करिब ९ करोड ३६ लाख रुपैयाँको लागतमा १८ महिनाभित्र आयोजना पूरा गरिएको हो।

आयोजनाबाट तिलाहार क्षेत्रका करिब ५६७ घरधुरीका ४ हजारभन्दा बढी स्थानीय प्रत्यक्ष लाभान्वित भएका छन्। यसअघि खोल्सा तथा अस्थायी मुहानको पानी प्रयोग गर्न बाध्य स्थानीयले अब घरघरमै सुरक्षित र स्वच्छ खानेपानी पाउने भएका छन्। आयोजनाअन्तर्गत मुहान संरक्षण, ट्यांकी निर्माण, पाइपलाइन विस्तार तथा घरघरमा धारा जडान गरिएको छ।

समापन कार्यक्रममा बोल्दै वक्ताहरूले सुरक्षित खानेपानी मानव जीवनका लागि अत्यावश्यक भएको उल्लेख गर्दै यसले स्वास्थ्य सुधार, समयको बचत तथा जीवनस्तर उकास्न महत्वपूर्ण भूमिका खेल्ने बताए। स्थानीय सरकार, समुदाय र विभिन्न सहयोगी निकायको सहकार्यमा आयोजना सफल भएको जनाइएको छ।

यस आयोजनाले तिलाहार क्षेत्रमा देखिँदै आएको पानीको अभाव अन्त्य गर्दै दीर्घकालीन समाधान प्रदान गर्ने विश्वास लिइएको छ। स्थानीयले अब सहज रूपमा शुद्ध पानी प्रयोग गर्न पाउने भएपछि स्वास्थ्य जोखिम कम हुनुका साथै दैनिकी पनि सहज हुने अपेक्षा नेपालको सोसाइटी कास्कीले राखेको छ।